2018年結

1) 回顧過去一年(2018/01/02-2019/01/02)，恒指全年了5384點，累跌17.6%，自己組合連已收股息總回報為-8.03%，能跑贏大市9%，算是不幸中之大幸。新一年要再努力點!

2) 我每年都有一個小習慣，就係鍾意係5隻全年跌幅最多的藍籌中選取一隻，然後放半年至一年，睇睇整體回報會否跑贏恒指，上年我就選左EX藍籌992聯想，如果聯想全年不計股息回報為18.88%，如計埋已收股息，總回報達24%，可為2018年的股王，哈哈。

今年五大最差表現藍籌（連股息，按跌幅排列） : 瑞聲（2018），全年跌66.81%。石藥（1093），全年跌4.34%。吉利（175），全年跌48.46%。中生製藥（1177），全年跌43.88%。恒安（1044），全年跌31.87%。我最後選了恒安，原因一來佢係5隻股息中最高，達4.4厘，二來佢係中國最大的衛生巾供應商， 恒安於2017年和2018年上半年在中國的衛生巾銷售方面仍然排名第一，佔相關市場份額約27%（比排名第二的市場份額高出約8%）。由於衛生巾是比較算係個人貼身用品，品牌同質素係好重要，用開果隻的話，好少會轉，呢兩樣就係恒安最大的護城河。股價方面，恒安一般都係起PE 15-20之間上落，個人認為PE 15或以下算係一個比較便宜的價格，所以最後選擇56.65買入一手試試眼光，希望年尾有所收穫啦:)

3) 最近review哂自己保險，做左部份整合，可能意識到人將到三十，感到責任開始黎，做好保障，免得有突發事情令自己家財盡失係好重要。因為我先前只有一份100萬住院醫療同一份40萬儲蓄危疾，年繳保費合共$11,193，月繳約$932，但人壽及意外保障係完全無，而且危疾40萬係根本唔足夠，所以我就取消左份儲蓄危疾，改為買入一份100萬非儲蓄固定十年保費的癌症保、一份200萬非儲蓄固定十年保費的人壽保、一份每日$1000住院現金保及一份意外保。

有趣ge係保額同保障大大提升左，但係年繳保費就少左好多，而家年繳保費合共只係$7,423，月繳約$618。前後一年相差近$3800。其實呢個分別就係在於儲蓄型同非儲蓄型的保險。大部份儲蓄型保險的保費都會比非儲蓄型係同一個保額上貴十倍以上，原因係保險公司需要係你的供款期內(say 20年) 收哂你部份20年的保費，然後再進行投資，用投資所賺到的紅利幫你交20年後的保費，當中亦包括醫療保呢D供唔斷的保險。

個人認為儲蓄型同非儲蓄型的保險各有各好處，最緊要係選擇自己岩的保障同保額。儲蓄型保險賣點係供完固定年期就以後都唔洗供，say 20年靠呢20年供多左的錢去賺紅利，但呢20年保費會貴好多，削弱左自己的購買力同財富創造能力，而且20年內退保損失會好大，儲蓄型保險比較適合月光族或只做現金儲蓄不作投資的人。 相反非儲蓄型的保險的最大好處係比少少保費就有一個好大的保額，槓桿較大，但係就因為供唔斷，要及早計劃諗下未來要比的保費，呢個保費係講緊50歲之後，因為其實20-50歲的保費升幅唔算話好大。 非儲蓄型的保險比較適合投資者，用年青的時間同承受風險的能力去創造出最大的財富，然後用被動現金流去交後期的保費 或者已經係60歲之後已經有流動資金1000萬+供斷左的樓，咁已經可以唔洗買保險保下半世哈哈。

P.S 原來市面上已經有保到80歲的非儲蓄保，最近見到匯豐銀行有個癌症保險係只要你驗到有原位癌/初期癌症，賠左20%之後已經唔洗再交保費，你仍然有另外80%保障 (either 癌左保or人壽保)到你80歲，有興趣可自行去匯豐官網睇。

組合更新 (2018/12)

終於到了2018年的最後一個月份，過往的一個月內，感覺股市已在牛一階段，但華為CFO突然比加拿大政府拘留，令到原本的升浪又停左，港股都係25000-27000之間上落。而呢個月，經過上一篇文章自己對投資的反思，組合上都做左部份調整。

1. 加入新成員709。睇完雲地兄的分析、自己又再睇睇年報之後，709的確實係一隻現金牛，資多過債，而且業務似乎轉型成功，慢慢見到增長，以我買入價計，預測息率近10厘，極具防守力。不過服裝競爭依然激烈，年青一群感覺都係以幫襯H&M、ZARA、UNIQLO為主，Baleno、Bossini、Giordano 較少，所以每季都要睇實佢個現金流變化，不時作出調整。

2. 在65蚊附近兩度增持匯控，持股量由400股升至1200股。買佢主要原因是由於股價升破6厘息率，以一年派4次息去睇十分吸引，而且係可見的未來，睇唔到佢有減派息的可能性，唯有食住6厘息待大市有突破性發展。

3. 股份由10隻調整到8隻，主要是想化整為零，始終股份愈多，需要分析的時間都愈多。

4. 每年現金流增加了，組合息率由4.4%升至5%。

月供股票方面繼續進行，今年最後一期供款由8000增至10000 (因11月中set左，改唔切)。但因見大部份股票都已經係低回升左不少，特別823 非常強勢，再創新高令我可買的數量減少了，所以決定下個月開始減少供款至7000。而由於供款額減少，月供數量減少至2隻，三選二的確是有點難度😩，因為3隻都係十分優質的股票，領展是我的主菜，在地鐵和中銀之間，最後選擇左地鐵，原因係我已經持有左一定數量的銀行股(匯豐)，公用股方面似乎比較少，選好後，暫定下月開始每月維持4000領展、3000地鐵。哈哈，2隻都是政府放入股市的寶物😁。
至於中銀方面，由於只有169股碎股，適逢今日跌市，我就趕快買入331股湊夠一手，日後搵機會再放。再見中銀香港😭

P.S 今年從手中丟失的兩隻寶物 - 香港電訊、中信國際電訊 又不斷創新高了，回想起如果年中自己沒有賣掉，現在的盈利可說是不少，而且當時兩者分別以9.7及2.15持有達70萬。以當時的買入價計，息率達6.5厘及7厘。可惜當時見帳面連已收股息有達20%利潤而沽出了，換馬恒基及奧園，期望兩者的隱藏價值能夠釋放，可惜之後遇上貿易戰及加息，令兩者都受壓。有時真的人算不如天算，一動不如一靜好了，哈哈。

重劍無鋒，大朽不工。

<重劍無鋒，大巧不工>
來源於金庸的小說《神雕俠侶》中，楊過得到一件神兵，是把厚重的鐵劍，上鑄八個字：“重劍無鋒，大巧不工。” 意思是說真正的劍技不是要依靠劍鋒，而是個人的修行。

過往的我一直在股場炒賣，嘗試低買高賣的操作，但奈何自己功力不夠深厚，在股場縱橫數年，雖然不至於損失慘重，但本金上亦不見有大幅增長。呢幾日見到雲地兄一文文，又適逢我剛過廿九歲生日，快將踏入三十中年大關，令我覺得真係要停下來反思一下，究竟咩先叫做投資?

其實以往我所有的炒賣操作都只係屬於投機行為，最長持有過的股票都只係得一年，好快就叫到佢升起左就賣左。最典型的例子就係我好叻咁係英國脫歐果日用50蚊買左匯豐，當時息率高達7.9厘，但係我就係匯豐升到70蚊果陣見帳面有40% profit放走左。 或者有人會覺得其實我呢個操作係岩，賺20蚊已經等於收左5年息，賺完咪再低位買過，輕鬆!

但係問題就黎，第一，幾時的匯控叫做低位? 參考番我50蚊買入的價位，真係唔知要幾時先再等到。第二，賣左匯豐之後，手頭上突然多左一筆資金，係零息環境下必然會心急想找出路，於是又貿貿然買入其他股再搏升，但可能選下隻的時候就無咁好彩，最後又可能輸番呢20蚊profit。 如果係咁的話，點解唔回到最初，安心持有一隻每年會派7.9厘息，仲要係一年派4次的股票，反而賣左佢再去股場上再追漲殺跌?

睇住雲地兄慢慢耐心地增持有一兩隻優質股，幾年後回報反而比不斷追漲殺跌的高，呢刻我終於覺悟，雲地兄完美演繹 重劍無鋒，大巧不工，真正的投資技巧不是單在於個股表現，而是在於個人的修行。就算選左隻好股，但心態唔得，最後都只會錯失所有機會。

黎緊呢一年開始我要決心放棄所有投機操作，專心買入優質股累續本金及被動收入，就如友人黎博亦已靠選到優質P2P公司，耐性持有數年，以平均年回報10%計亦已快賺取接近一倍的回報了，耐性、專一真的很緊要。

組合更新 (2018/11)

恒指keep住係25000-26000點之間上落，確認進入熊市時期後，我也在七月開始月供股票，由一開始的$3000， 慢慢增加額度到今個月的$8000。唔一手手買的原因係因為一來每手買成本高，熊市時期入市好易今日低位， 明日高位， 買一手價錢等於兩三個月月供，我自知眼光差，又唔想錯過入市機會，與其日日係到等，不如等的時間都小注買入。除左之前講的地鐵外，10月同11月分別加入新成員領展同中銀香港。

至於月供以外的股票組合，暫時都係滿江紅，截至11月20日，整個組合全年 -12%，同期恒指全年-15%，大概可安慰自己勉強跑贏恒指3%😁😅 組合平均股息率維持4.4%左右，繼續悶著收息。

現時月供計劃的股票組合:

現時持有股票(不計月供部份，主要是一手買的貨):

加入新成員 恒基、小米、奧園

最近幾個月都不斷調整組合及將部份長線收息的股票調去銀行。這幾個月主要買賣行動:
賣出香港電訊，換入恒基地產，我會待價格戰等壞消息再10元以下搜集。

賣出中信國際電訊，一口氣連升幾天，由2.1升到2.45，股息率亦有7%跌至6.6%，差不多與香港電訊一樣，估值不吸引。

小米於IPO時已有抽，亦期間短線炒賣數次獲利，而最近幾月有幾次回落至IPO價17蚊以下，筆者再度搜集。照舊睇好小米前景，期待POCOPHONE的銷售。

奧園: 高增長 高派息的內房股，有恒大的影子。

中國建築: 9元以下購入，繼續炒波幅。

我選了既有地產股性質又有公用股特性的地鐵作長線組合，另外大股東為持有75%股份的香港政府，近乎零倒閉風險。

最新持倉:

恒基地產

九龍倉置業

小米集團

中國建築

中國奧園

地鐵

滄海遺珠 中信國際電訊 2017末期業績

截至去年12月底止全年業績，純利8.81億元，按年升3.68%；每股盈利24.9仙；派末期息13仙。EBITDA錄得20.67億元，按年升3.1%。

中信國際電訊主席辛悅江出席業績發布會時表示，集團致力推動長遠發展，希望成為不斷擴大規模的企業，在併購方面從來沒有停止，亦一直有關注香港或歐洲的併購機會

辛悅江又承認，過去公司股價較弱，正努力調整部署，又認為公司業績及派息逐年上升，在業務覆蓋上亦逐漸加強，惟股價仍然低迷，反映公司在宣傳及交流上有不足，今後會加強相關工作，另外公司被納入港股通後，他相信有助引起內地投資者對公司的關注。

他又指，中信收購澳門電訊已有四年時間，期內投資達25億元以上，說明有很大決心提升集團的網絡質素及服務能力。

2月頭以平均價2.15買入，由於今年末期股息每股13港仙，計及中期息每股3港仙，對應股息率達7.44厘，而且全年派息按年增長21.2%，是AM手頭上一隻強勁的後防收息股。值得一提的是 AM翻查1883過往十年的派息紀錄，十年內都是有增無減的!

我一直不明的是如此強勁的收息股，為何一直股價如此低迷? 也許有如上面主席辛悅江所講 公司在宣傳及交流上有不足，一直都無人關注此股，成交量低，望納入港股通後，股價能有所上升:)

******************************************************************
最新買入動作:

匯豐: 昨日跌至一個月低位，由於我相信超低息周期不會復再，加息環境只會利好銀行股，現價已跌至5.1厘，已具一定防守性，故以77.6再度增持，長線持有。

趁52周新低買入華潤電力、買入中國建築炒波幅

內地龍頭電力企業，近年因煤價高企，令靠煤發電的電力公司成本高漲，盈利受打擊。
估值上面，現價13.06, 息率達6.7%，市盈率得番8倍。 睇番佢公司10年內3次最低位都係10個幾，再下行的空間已經不大，我估最差最差跌多10%，但因為公司promise 3年派息率不變。所以跌多10% 到11.7，派息率會升到7.5%，機會唔大。而且中央高調 煤電聯動，如果煤炭價格再升，始終會反映番係電費到。

相反，如果煤炭價格下降或者電費上升，有利佢盈利增加，吹起買入相關股份時，佢彈上14-15蚊可能係幾日的事。

另外10蚊附近買入中國建築炒波幅。

最新持倉:

香港電訊

九龍倉置業

聯想集團

匯豐控股

華潤電力

中信國際電訊

中國建築國際